Kur zemrës i mungon Drita
Syrit çdo gjë i shfaqet e errësuar
Padituri s’do të thotë të mos dish
Por të dish në mënyrë të gabuar
Nga mungesa e Dritës në zemër
Nuk sheh dritën e asnjë zemre
S’të çon padituria në shkurtpamësi,
por dituria e rreme
Drita nuk është një mendim
Ajo është njohje dhe dëshmi
Nëse dituria shembëllehet me detin
Deti nuk njihet në cektësi
Zhurmaxhinjtë më të mëdhenj në det
Janë ata që mbeten në cektësi duke u larë
E jo ata që në thellësinë e tij
Takohen me perla e margaritarë
Në cektësi deti shihet, por s’njihet
Një guaskë secili aty mund ta gjejë
Por kur zemra mbyllet brenda një guaske
As sa një guaskë në jetë s’do të vlejë
Lutu për Dritën e Zemrës
Po deshe të të vlejnë sytë
Se ndryshe e gjithë dituria,
bëhet veç ferri yt. ~ Fatmir Muja
(2011)
