Jam Gegë Toska, mbrapsht e mbarë
Jam i plotë, por jam i ndarë
E kam gjuhën me shumë ngjyra
Një gjë shpreh në shumë mënyra
Po s’po m’ban ma gjuha punë
Se askush s’po m’pyet për gja
Mue m’njohin mirë të tjerët
Unë s’due veten me njoftë hala
Kur ta zë bishtin rrota
Ta tregon vendin gjithë bota
Si s’u mbusha një herë mend
Çdoherë rrëzohem në të njëjtin vend
“Mjerë i dobëti sa i fortë asht”,
m’ka pasë thanë gjyshi mue
E kuptova kur erdhën t’tjerët
E m’çliruen për me m’sundue
Që kur veten kam braktisur
Më vajti koha duke u vardisur
Në vendin tim jam si i huaj
Zot shtëpie tjetrin e quaj
Ama edhe mue m’rrjedh loti
Me e ruejt vendin s’qesh i zoti
Kam ndjesi, po s’kam fuqi
Se jam mbret, po pa mbretni
Unë jam nyjë në histori
Çfarë mësoj sot, nesër s’e di
E kur nyjën s’e zgjidh dot
E këpus fare, nuk rri kot
Bie me fjetë natën me miq
Mirëpo zgjohem me armiq
Sikur peshkun përherë m’kanë pa
Ushqim m’japin, ushqim me m’ba
Asht me qeshë tue qa
Qysh me pri kur janë tuj m’grah
S’jam i pari n’vendin tem
Nuk ka kenë as vëllai jem
Janë ca kohë që më mallëngjejnë
Te stërgjyshi im më kthejnë
Tirq e fustanella kam
Por për to i denjë nuk jam
M’i dha Haku mal e det
Mirpo hakun s’ua dhashë vetë
Tana fetë në shpi i kam
Dhe kam frikë që pa fe jam
Asht gjynah, por janë tue m’thanë:
“Nuk ia vlen me u ba kurban”
Shkurt kam folë, por e kam zgjatë
Hajt për t’majr, shihemi prapë! ~ Fatmir Muja
